काठमाडौं । नेकपा एमालेका अध्यक्ष केपी शर्मा ओलीले नेपालमा जातको नाम जोडेर प्रदेश निर्माण नहुने बताउनुभएको छ । उहाँले कुनै हालतमा पनि जातिय संघीयता नहुने ठोकुवा गर्नुभयो । ओलीले नेपाली कांग्रेसका कारण मूलुकमा परिवर्तन र विकासमा अवरोध हुने गरेको आरोप पनि लगाउनुभयो ।
कम्युनिष्ट पार्टीको ६७ औ स्थापना दिवसको अवसरमा नेकपा एमालेले प्रज्ञाभवनमा आयोजना गरेको कार्यक्रममा एमाले अध्यक्ष ओलीले जातका आधारमा नेपालमा संघीयता हुनै नसक्ने दाबी गर्नुभयो ।
कम्युनिट पार्टी स्थापना र विकास क्रममा झापा आन्दोलनको अतुलनीय भूमिका रहेको प्रशंग कोट्याउँदै ओलीले तत्कालिन झापा विद्रोह गणतन्त्र नेपाल निर्माणको जग भएको दावी गर्नुभयो । तत्कालिन समयमा सशस्त्र विद्रोह ठीक भए पनि त्यसपछि क्रान्तिका नाममा एकीकृत माओवादीले उठाएको हतियार भने गलत भएको बताउनुभयो ।
सत्तारुढ दल कांग्रेससँग निक्कै असन्तुष्ट रहनुभएका ओलीले मुलुकको परिवर्तन र विकासका लागि कांग्रेस बाधक भएको टिप्पणी गर्नुभयो । कांग्रेसले कम्युनिष्टसँग एकता र सहकार्य गरेर अघि बढ्न नसक्दा मुलुकमा निरंकुश शक्तिले पटक पटक टाउको उठाउने मौका पाएको उल्लेख गर्नुभयो ।
कार्यक्रममा एमाले नेता माधव नेपालले एक देशमा एक भन्दा बढी कम्युनिष्ट पार्टीको स्थापना हुने भएपनि कम्युनिष्ट विचार धारा भने एकै हुने बताउनुभयो । उहाँले जनताको माझमा कसरी लोकप्रिय बन्न सकिन्छ भनेर ध्यान दिनुपर्ने बताउनुभयो ।
राष्ट्रियता, विकासलगायतका विषयमा नेताहरुले लोकप्रियाता हासिल गर्नुपर्ने बताउनुभयो ।
नेपालको राजनीतिमा मधेशवादी दलको कुनै अर्थ नभएको भन्दै नेपालले माओवादीहरु केहीसमय उदाएका भएपनि अब अस्ताउन लागेको बताउनुभयो ।
कार्यक्रममा एकताबद्ध र सबल नेकपा एमालेले मात्रै जनक्रान्तिको चालू प्रक्रियालाई निष्कर्षमा पुर्याउने धारणा नेताहरुले राखेका थिए । लम्बिँदो संक्रमण कालले नेपाल कमजोर भएको भन्दै एमाले नेताहरुले अब देशको विकासमा एमाले अघि बढ्ने दाबी गरेका छन् ।
