लन्डन । तमु समाज यूकेले तमु ल्होसार भव्य रूपमा मनाएको छ । विभिन्न कार्यक्रम गरि लन्डनस्थित ह्यारो लेजर सेन्टरको बाईरोन हलमा गत शनिबार ४ जनवरीमा तमु ल्हाेसार मनाइएको हो ।
समाजका अध्यक्ष बिन्दु कुमारी गुरुङको अध्यक्षतामा भएको औपचारिक कार्यक्रममा काउन्सिल लिडर लन्डन बारो अफ ब्रेन्टका काउन्सिलर मोहमेद बटको प्रमुख आतिथ्यता रहेकाे थियाे ।
कार्यक्रमलाइ सम्बाेधन गर्दै प्रमुख अतिथि मोहमेद बटले तमु समाज युकेले आयोजना गरेको भव्य कार्यक्रममा सहभागी हुन पाउँदा खुसी लागेको बताए । तमु समाज यूकेले संस्थागत रूपमा ब्रेन्ट काउन्सिलमा धेरै साथ र सहयोग दिँदै आएको र समाजलाई काउन्सिलले पनि आवश्यक सहयोग गरिरहेको उनको भनाइ थियो । उनले भविष्यमा पनि समाजलाई थप सहयोग गर्ने प्रतिबद्धता जनाउँदै ल्होछार र अङ्ग्रेजी नयाँ वर्षको शुभकामना दिए ।
विगतमा जस्तै यस वर्षको सप्री ल्होछार कार्यक्रमको अवसरमा नयाँ आजीवन सदस्यलाई सदस्यताको प्रमाण पत्र तथा समाजको लोगो अंकित ब्याज वितरण गरिएकाे थियाे । साथै शैक्षिक सत्र २०२४ मा स्नातक तथा स्नातकोत्तर तहमा सफलता प्राप्त विद्यार्थी तथा विगतमा सामाजिक जीवनको विभिन्न पक्षमा महत्त्वपूर्ण भूमिका निर्वाह गर्नुको साथै सामाजिक सेवा र संस्थाको विकासमा योगदान पुर्याउने महानुभावलाई तमु समाज यूके विशिष्ट समाज सेवा सम्मान (लाइफ टाइम एचिभमेन्ट अवार्ड – २०२५), तमु समाज यूके उत्कृष्ट समाज सेवा सम्मानपत्र २०२५ तथा प्रशंसापत्र प्रदान गरिएको थियो ।
प्रमुख अतिथि, समाजका अध्यक्ष, संस्थापक अध्यक्ष तथा सल्लाहकार चित्र बहादुर गुरुङ र आमा समूहका अध्यक्ष विमला गुरुङले सम्मान तथा प्रशंसापत्र वितरण गरेका थिए । समाजको स्थापनादेखि अनवरत रूपमा विभिन्न महत्त्वपूर्ण पदमा रहेर योगदान गरेका सामाजिक अभियन्ता तमु समाज यूकेका निवर्तमान अध्यक्ष शिव कुमार गुरुङ र पूर्व उपाध्यक्ष तथा सल्लाहकार कन्या प्रसाद गुरुङलाई तमु समाज युके विशिष्ट समाज सेवा सम्मान (लाइफ टाइम एचिभमेन्ट अवार्ड २०२५) बाट सम्मान गरिएको थियो ।
यसैगरि विभिन्न संघ संस्थाका नवनिर्वाचित अध्यक्षहरूमा तमु धीं यूकेका अध्यक्ष जुमकाजी गुरुङ, तमु धीं युके आमा समूहकी अध्यक्ष कमलादेवी गुरुङ, पत्रकार महासंघ युके अध्यक्ष विमला सेनेलाई खादा फेटा र दोसल्ला ओढाई पुष्पगुच्छा प्रदान गरी बधाई तथा कार्यकाल सफलताको शुभकामना दिइकाे थियाे ।
सम्मान कार्यक्रमको अवसरमा तमु धीं नेपालका अध्यक्ष हुम बहादुर गुरुङले शुभकामना दिदै तमु समाज युकेले प्रदान गरेको सम्मान सधैँ शिरोपर गरेर सकारात्मक भावनाका साथ तमुहरू र सबै नेपालीको हितका लागि काम गर्ने प्रेरणा मिलेको बताए ।
