लन्डन । बेलायत भ्रमणमा रहेका तमु समाज हङकङका संस्थापक अध्यक्ष कोमल गुरुङ (स्याङ्जाली कान्छा) र महिला विभाग अध्यक्ष राधा गुरुङलाई तमु समाज युकेले सम्मान गरेको छ ।
लन्डनको वेम्बली बरहामपार्कस्थित तमु समाज युकेको सामुदायिक भवनमा सोमबार २६ अगस्ट २०२४ मा एक कार्यक्रमबीच कोमल र राधालाई स्वागत तथा सम्मान गरिएको हो । समाजकी अध्यक्ष विन्दु घले गुरुङको अध्यक्षतामा भएको कार्यक्रम उपाध्यक्ष केदार गुरुङले सञ्चालन गरेका थिए । जलपानसँगै तमु समाजको परिचयात्मक भिडियो क्लिप देखाएर उक्त कार्यक्रम सुरु भएको थियो ।
इथ्निक माइनोरिटिज् कमिटी सदस्य, जनसेवा समितिका हङकङका पूर्वअध्यक्ष, एनआरएनए हङकङका सल्लाहकारसमेत रहेका अध्यक्ष कोमल र महिला विभाग अध्यक्ष राधाको बारेमा उपाध्यक्ष केदारले विस्तृत जानकारी गराए । अध्यक्ष विन्दु र संस्थापक अध्यक्ष चित्रबहादुर गुरुङ तथा आमा अध्यक्ष विमला गुरुङ र निवर्तमान अध्यक्ष उमादेवी गुरुङले संयुक्त रूपमा खादा, माला, फेटा र मायाको चिनोसहित सम्मान गरे ।
निवर्तमान अध्यक्ष शिवकुमार गुरुङ, पूर्व अध्यक्षकार्जङकुमार गुरुङ, शिवचन्द्र गुरुङ र आमा समूहका पूर्वअध्यक्ष माया गुरुङ, तमु समाजका सल्लाहकार लगायतले पनि खादा र माला लगाएर समाजसेवी कोमल र राधालाई स्वागत, सम्मान गरेका थिए । त्यसक्रममा तमु समाज युकेका सल्लाहकार एवं तमु धीं यूकेका पूर्वअध्यक्ष सुवाससिंह गुरुङले पनि अतिथिद्वयलाई स्वागत, सम्मान गरे ।
