लन्डन । गैरआवासीय नेपाली संघ (एनआरएनए) यूकेले यही अगष्ट अन्तिम साता एक सार्वजनिक सुनुवाइ कार्यक्रम गर्ने भएको छ । अगष्ट २६ तारिख सोमबार अल्डरसटको एम्पायर ब्यांकेटिङमा संघ र संघको अभियानहरुका बारेमा सार्वजनिक सुनुवाइ गर्न लागिएको हो ।
कार्यक्रममा प्रमुख आकर्षणका रुपमा संघको अन्तरर्राष्ट्रिय समन्वय परिषद (आइसीसी) का अध्यक्ष डा. बद्री केसी सहभागी हुने भएका छन् । (एनआरएनए) यूके महासचिव गोविन्द खरेलका अनुसार कार्यक्रम गोर्खा आन्दोलन र यसका पक्षमा (एनआरएनए)को पहल, सम्पत्तिको सुरक्षा र नागरिकता निरन्तरता तथा (एनआरएनए)को आगामी कार्यभारलगायतका एजेन्डामा केन्द्रित रहनेछ ।
साथै यी मुद्धाहरुमा भइरहेका पछिल्लो प्रगति र अपडेटबारे जानकारी गराइनुका साथै कार्यक्रममा सहभागीहरुले राखेका जिज्ञासामा आइसीसी अध्यक्ष डा. केसी, (एनआरएनए) यूके अध्यक्ष हित काजी गुरुङसहितका पदाधिकारीले जवाफ दिनेछन् ।
बेलायतका लागि कार्यवहाक नेपाली राजदूत रोशन खनाल प्रमुख अतिथि रहने कार्यक्रममा (एनआरएनए) आइसीसीका पदाधिकारी, (एनआरएनए) यूकेका अगुवासहित बेलायतस्थित नेपाली संघसंस्था र समुदायका प्रतिनिधि सहभागी हुनेछन् । सोहि अवसरमा एनआरएनए यूकेले आइसीसी अध्यक्ष डा केसीलाई स्वागत तथा सम्मान पनि गर्ने कार्यक्रम छ ।
एनआरएनए यूके अध्यक्ष हित काजी गुरुङले संघका पछिल्ला गतिविधि र आगामी कार्ययोजनाबारे बेलायतवासी आम गैरआवासीय नेपालीलाई जानकारी गराउनु कार्यक्रमको प्रमुख उद्देश्य रहेको बताए । उनले बेलायतवासी सबै नेपालीलाई कार्यक्रममा आएर (एनआरएनए) र यसका अभियानहरुबारे बुझ्न, नबुझेका कुरा सोध्न र आफूलाई लागेका सल्लाह, सुझाव दिन समेत आग्रह गरेका छन् ।
कार्यक्रम अपरान्ह ३ बजेदेखि बेलुका ९ बजेसम्मलाई तय गरिएको छ ।
