लन्डन । प्रवासमा रहेका नेपाली बालबालिकाहरुको प्रतिभा बाहिर ल्याउन प्रोत्साहन गर्ने तथा नेपाली कला, संस्कृतिको प्रवासमा प्रवर्द्धन गर्ने उद्देश्यका साथ क्रियाशील संस्था प्रतिभा नक्षत्रको पाँचौं संस्करण प्रतिभा नक्षत्र २०२४ यहि अगस्ट २६, सोमबारको दिन लन्डनको सेन्ट जोर्ज ग्यारिसन हल, विल्विचमा हुने भएको छ । 

कार्यक्रममा नेपाली गीत, सङ्गीत, नृत्य, कला, साहित्य, चित्रकला लगायतका जुनसुकै विधामा पनि बालबालिकाले प्रतिभा देखाउन सक्ने कुरा उक्त संस्थाका संरक्षक मनिष श्रेष्ठले बताए । यस वर्ष विभिन्न देशका बालबालिकाहरुले नेपाली गीत, संगीत, नृत्य प्रस्तुत गर्ने र उनीहरुसंग भएको विविध प्रतिभा प्रदर्शन गर्ने तयारी रहेको कार्यक्रम संयोजक एवं संस्थाका सल्लाहकार कुमार श्रेष्ठले बताएका छन । कार्यक्रममा लाखेनाच, कुमारीनाच, पञ्चेबाजा प्रदर्शन गर्नुका साथै थारु जातीको मौलिक घर, नेपालका मौलिक सरसामान मादल, डोको, डालो, ढिकी, जाँतोको प्रदर्शनी लगायत नेवारी, थकाली, खस, मगर, गुरुङ समुदायको खानाको परिकार सहितको स्टलहरु रहने कार्यक्रम संयोजक श्रेष्ठले जानकारी गराएका छन ।  

सन २०१७ देखि हरेक वर्ष नियमित रुपमा हुँदै आएको प्रतिभा नक्षत्र कार्यक्रममा सहभागी हुन चाहने जुनसुकै देशमा रहने नेपाली समुदायका बालबालिकाले प्रतिभा नक्षत्रको वेभसाइट तथा फेसबुक पेजमा गएर आवेदन दिन सक्ने गरी व्यवस्था मिलाइएको छ ।

यस वर्षको प्रतिभा नक्षत्र कार्यक्रममा अतिथिको रुपमा नेपालका चर्चित कलाकारहरु दिप श्रेष्ठ, सुरज श्रेष्ठ, पल्पसा डंगोल लगायतका कलाकारहरुको सहभागिता रहनेछ भने बेलायतस्थित स्थानीय कलाकारहरुको बाक्लो उपस्थिति रहनेछ । यस कार्यक्रममा आइएनएएस यूके, बुद्ध फाउण्डेशन यूके, जामघाट परिवार, एनआरएनए यूके लगायतका संस्थाहरूको विशेष सहयोग रहनेछ ।