काठमाडौं । बेलायतबाट ८ सेप्टेम्बर २०२४ मा काठमाडौं आइपुगेका सुष्मा गुरुङ नेतृत्वको कैलाश यात्रा टोलीले काठमाडौंस्थित धार्मिक स्थलहरुको भ्रमण गरेको छ ।
कैलाश मानसरोवर तर्फ प्रस्थान गर्नुअघि ९ सेप्टेम्बर सोमबार पशुपति, गुहेश्वरी र बुढानीलकण्ठका मन्दिरहरु दर्शन गरिएको हो । बेलायतबाट आएका पण्डित मधुसुदन सत्यालको अगुवाईमा बिहान ७ बजेदेखि पशुपतिमा रहेका विभिन्न मन्दिरहरुमा सामूहिक पूजापाठ गरिएको थियो । त्यसपछि गुहेश्वरी र बुढानीलकण्ठको मन्दिरमा दर्शन गरिएको टोलीमा सहभागीले जनाएका छन् ।
शिव कल्चरल एन्ड कम्युनिटी सेन्टर युकेको आयोजनामा भएको उक्त टोलीमा ३ जना विदेशीसहित ३० जना छन् । टाेली काठमाडौंबाट ११ सेप्टेम्बरमा प्रस्थान गरेर २३ तारिख ल्हासाबाट फर्किएपछि पनि होटल ह्याथ प्यालेस काठमाडौंमै एकरात बसी २४ सेप्टेम्बरमा आ-आफ्नो गन्तव्यतिर लाग्ने जनाइएको छ ।
