लन्डन । गैर आवासीय नेपाली संघ (एनआरएनए) यूकेको नयाँ कार्यसमितिका लागि ३६ जनाले उम्मेदवारी दर्ता गरेका छन् ।
संघका अध्यक्ष, उपाध्यक्ष, महासचिवलगायत विभिन्न ३६ पदका निमित्त १९ मार्च २०२५ का दिन ३६ जनाको उम्मेदवारी दर्ता भएको निर्वाचन समितिले जनाएको छ । निर्वाचन समितिका सदस्यसचिव विश्वासदीप तिगेलाले एनआरएनए कार्यालयमा बुधबार बिहान ९ बजेदेखि बेलुकी ५ बजेसम्म भएको मनोनयन दर्तामा ३६ जनाको उम्मेदवारी परेको र त्यसबाट १३ हजारभन्दा बढी पाउन्ड संकलन भएकोसमेत जानकारी दिए ।
अध्यक्ष र आईसीसी पदको उम्मेदवारी दिन १ हजार पाउण्ड, उपाध्यक्ष र महासचिव उम्मेदवारका लागि ५०० पाउण्ड, सचिव, महिला सचिव र कोषाध्यक्ष पदका लागि ३०० पाउण्ड, सहकोषाध्यक्ष, महिला संयोजक र युवा संयोजक उम्मेदवारले २०० पाउण्ड एवं १८ सदस्यहरुले उम्मेदवारी शुल्क १०० पाउण्ड शुल्क तोकिएको थियो ।
एनआरएनए एनसीसी यूकेको यही मार्च २३ मा एकता अधिवेशन हुँदै छ । उक्त निर्वाचनका लागि भएको उम्मेदवारी दर्तामा २० मार्च दिउँसो १ बजेसम्म उम्मेदवारीउपर दावी/विरोधको समयसीमा दिइएको छ । उम्मेदवारी फिर्ताका लागि पनि बिहीबार २० मार्च दिउँसो ३ बजेसम्म र अन्तिम उम्मेदवारहरुको नामावली प्रकाशन २० मार्च साँझ ७ बजेको समय तोकिएको निर्वाचन समितिले जनाएको छ ।
२१ मार्च दिउँसो उम्मेदवारहरुका प्रतिबद्धता सार्वजनिक गरिने र २३ मार्चका दिन निर्वाचन, नतिजा घोषणा र शपथ हुने समितिले जनाएको छ । अधिवेशनले ३६ सदस्यीय एनआरएनए एनसीसी गठन गर्नेछ ।
निर्वाचन समितिको संयोजकमा डा. भिम पुन,सदस्यसचिव विश्वासदीप तिगेला, सदस्यहरुमा राजकुमार त्रिपाठी र टेकबहादुर थापा छन् ।
