लन्डन । गैर आवासीय नेपाली संघ (एनआरएनए)का पूर्वअध्यक्ष कुल आचार्यको उपस्थितीमा बेलायतमा लाईन्स क्लबको स्थापना भएको छ । नेपाली समुदायको एकता, सामाजिक सेवा र पहिचानलाई मजबुत बनाउन युकेको नेपाली समुदायमा दोश्रो क्लबको रुपमा ‘कोभेन्ट्री नेपालिज लायन्स क्लब’ स्थापना गरिएको हो । समाजसेवी व्यक्ति गोबिन्द सापकोटाको अध्यक्षतामा गठित क्लबमा २० जना सदस्य रहेका छन् ।
कार्यक्रमका प्रमुख अतिथि लायन्सका युके डिस्ट्रिक्ट गभर्नर Lion Stu Young ले नयाँ क्लबलाई आधिकारिक प्रमाणपत्र प्रदान गर्दै लायन्स क्लबको ब्याज लगाइदिएर औपचारिक रुपमा स्वागत गर्नुभयो । उनले नेपालमा लायन्स क्लबले गरिरहेको उल्लेखनीय कार्यको प्रशंसा गर्दै नेपालमा लायन्स क्लबको सदस्यता उल्लेखनीय रूपमा वृद्धि भई विश्वकै शीर्ष स्थानमा पुगेको जानकारी दिनुभयो ।
त्यस्तै कार्यक्रमका विशेष अतिथि गैर आवासीय नेपाली संघका पूर्व अध्यक्ष कुल आचार्यले लाईन्स क्लबले नेपालमा पुण्यका काम गरिरहेको र यहाँ पनि सिक्नु पर्ने भन्दै नेपालीहरुले जहाँ भए पनि आफ्नो मातृभूमिलाई विर्सन नहुने बताउनु भयो ।साथै आचार्यले क्लबको सफलताको लागि शुभकामना व्यक्त गर्नुभयो ।
स्वास्थ्य, शिक्षा, व्यवसाय, र सामाजिक सेवाका क्षेत्रमा सकारात्मक परिवर्तन ल्याउने लक्ष्यसहित स्थापना गरिएको क्लबको उद्घाटन कार्यक्रम क्लबका सचिव रमेश खनालले संचालन गरेका थिए । कार्यक्रममा युकेका विभिन्न संघ सस्थाका प्रतिनिधिको व्यपक उपस्थिति रहेको थियो ।
कार्यक्रम समापन गर्दै अध्यक्ष गोबिन्द सापकोटाले उपस्थित सम्पूर्णलाई धन्यवाद व्यक्त गरेका थिए । साथै सापकोटाले अन्तर्राष्ट्रिय संघसँस्थासँग जोडिएर सेवा गर्ने अवसर जुटेकाले सबैको साथ मिल्ने आशा व्यत्त गरेका छन् ।
