लन्डन । नेपाल विद्युत प्राधिकरणका पूर्व कार्यकारी निर्देशक कुलमान घिसिङ बेलायत आउने भएका छन् । घिसिङ हाल अमेरिका रहेका छन् । उनी ११ अगस्टमा लन्डन आइपुग्ने तय भएको छ ।
छिट्टै बेलायत आउन लागेका कुलमानसँग एनआरएनए यूकेले आगामी १५ अगष्ट साँझ अल्डरसटस्थित एम्पायर हलमा ‘मिट एन्ड ग्रीट’ गर्ने तयारी गरेको छ । उनलाई पाइपर धुनका साथ स्वागत गरेर नागरिक अभिनन्दन गरिने छ । कुलमानसंग एनआरएनए यूकेले आगामी १५ अगष्ट साँझ अल्डरसटस्थित एम्पायर हलमा ‘मिट एन्ड ग्रीट’ गर्ने तयारी गरेको छ ।
एनआरएनए यूके अध्यक्ष प्रेम गाहामगरले घिसिङसंग साक्षात्कार गर्न बेलायतस्थित नेपाली समुदाय निकै उत्साहित भएको बताए । ‘अहिले नै नेपाली संघसंस्थाले २२ वटा टेबल बुक गरिसक्नु भएको छ । तामाङ घेदुङ यूकेका अध्यक्ष हरिसिंह वाइवा (तामाङ) ले मात्र ४० गेष्ट कन्फर्म गर्नु भएको छ’, अध्यक्ष गाहामगरले भने, ‘हामी अन्य ठूला संघसंस्थाहरु र व्यक्तिलाई समेत आमन्त्रण गर्दछौँ। किनकि उज्यालोका प्रतीक र देशलाई केहि गर्छु भन्ने निस्वार्थ भावना भएका व्यक्ति कुलमानसंग साक्षात्कारको अवसर फेरि नआउन सक्छ।’
उनले बेलायतवासी समस्त नेपाली र विशेषगरि भूतपूर्व गोर्खाहरुलाई कार्यक्रममा आउन अपिल गरे । सो अवसरमा अब नयां वैकल्पिक शक्तिमार्फत राजनीतिमा प्रवेश गर्न लागेको चर्चा भइरहंदा घिसिङले आफ्नो भावी योजना सुनाउनेछन् । साथै सहभागीहरुले उनलाई विभिन्न जिज्ञासा समेत राखेर आफ्ना सुझाव दिन सक्नेछन् ।
