भारतको नाकाबन्दीका कारण नेपालका अस्पतालहरुमा अत्यावश्यक औषधिको अभाव भएपछि गैरआवासीय नेपाली संघले नेपाल सरकारलाई करिव १ करोड २५ लाख रुपैयाँ बराबरका जीवनरक्षक औषधि सहयोग गरेको छ । स्वास्थ्य सेवा विभाग टेकुमा शुक्रबार संघका अध्यक्ष शेष घलेले स्वास्थ्य तथा जनसंख्या राज्यमन्त्री मो. मुस्ताक आलमलाई औषधि हस्तान्तरण गर्नुभयो ।
संघले शुक्रबार ५० लाख १८ हजार रुपैयाँ बराबरको औषधि सरकारलाई हस्तान्तरण गरेको हो । खरिद गरेको करिव १२ लाख रुपैयाँ बराबरको औषधि बंगलादेशबाट आगामी साता काठमाडौं आइपग्ुने संघले जनाएको छ । यी औषधि पनि संघले स्वास्थ्य मन्त्रालयलाई हस्तान्तरण गर्नेछ । यी सवै चरणमा गरी संघले सरकारलाई कुल १ करोड २५ लाख रुपैयाँको औषधि हस्तान्तरतण गरेको हो । एनआरएनले उपलब्ध गराएको औषधि काठमाडौं तथा काठमाडौं बाहिरका क्षेत्रिय अस्पताललाई ६ हप्ताका लागि पुग्ने अनुमान गरिएको छ । सरकार र सम्बन्धित अस्पतालहरुले दिएको सूचीअनुसार विशेषज्ञ चिकित्सकसमेतको सहभागितामा औषधि खरिद गरी नेपाल सरकारलाई दिइएको संघले जनाएको छ ।
नेपालीका लागि नेपाली’ भन्ने हाम्रो मूल मन्त्रलाई आत्मसात गर्दै मातृभूमिलाई परेको बिपतको बेला साथ दिने कोसिश अनुरुप विपदमा हिजो पनि चुप लागेर नबसेको, आज पनि नबस्ने र भोलिका दिनमा पनि आइपर्ने कुनै पनि अप्ठेरो परिस्थितिमा संसारभरका गैरआवासीय नेपालीहरुको साथ रहने संघका अध्यक्ष शेष घलेको भनाई थियो ।
अध्यक्ष घलेले मानवीय संकट समाधान र यसलाई अन्तर्राष्ट्रियकरण गर्ने अभियानमा सहभागी हुने सबै सहयोगी हातहरुप्रति आभार प्रकट गर्नुभयो ।
पहिलो चरणमा नेपाल सरकारलाई करिव तीन करोडको औषधि दिने योजना रहेको भए पनि अस्पताल र सरकारसँगको छलफलपछि अन्य दातृनिकायलेसमेत अत्यावश्यक औषधिहरु सहयोग गरिरहेको हुँदा आवश्यक परेको खण्डमा फेरि सहयोग गर्ने संघ प्रतिबद्ध छ ।
यसअघि संघले पहिलो चरणमा मंसिर ८ गते ३८ लाख मल्ूय बराबरको औषधि हस्तान्तरण गरेको थियो । त्यसैगरी संघले जनकपुर, बीरगञ्ज र बुटवलका क्षेत्रीय अस्पतालहरुलाई २५ लाख ७४ हजार रुपैयाँ बराबरको औषधि हस्तान्तरण गरेको थियो ।

 }